sù e jù denant de buteghe dal oresin disesiet voltis
e ogni volte a veve tentât di puartâlu dentri parcè che lui j compràs un anel
di impromission.
— E se nol mi fos pontât cun ducj e doi i pîts, cuissà
mai cemût che al sarês lade a finî! — al contà po Fredo une vore content. Si
legrà tal viodi Milio, si capìs. Milio al spesseà a contâi dal cjaval, e a
restarin li a suspirâ ducj e doi sul fât che chel cjaval nol sarês mai lât a
Katthult. Ma po Fredo al cuistà un cuc di crep a Milio dal vendidôr di vâs che
al stave sule place a vendi robis dal gjenar.
— Chest tu lu acetis di part mê come regâl de fiere —
al disè Fredo e daurman tal cûr di Milio, dulà che prime a jere tante
avilizion, a fo come une sensazion une vore dolce.
— Ben ben, i cucs di crep tu ju sâs comprâ!
— a disè Line. — E cumò, cuant si decidie a rivâ
cheste stele comete? Mi somee che a sedi l’ore!
Ma no si viodeve nissune stele comete, e l’orloi al
stave segnânt misdì, si che duncje e jere bisugne di spesseà.
Fredo e Line a scugnivin lâ a viodi di Markus e
Jullan e mangjà il lôr modest gustà. Cun lôr, a vevin il zeut de gulizion, sule
caroce dentri une cosse. Milio ur sarês lât daûr vulintîr, ma al saveve di
scugnì gustà de siore Petrell a misdì, e cussì si cjalà ator par cirì so pari.
Ma so pari al jere sparît di gnûf! Al jere sparît in tal mieç di che confusion
di caramelaris e di scudielârs, tal mieç di chei che fasevin cos e sborfins, ai
vendidôrs di balons e ai sunadôrs di organets e a ducj i altris marcjadants de
fiere.
Nessun commento:
Posta un commento