65 (239)

cjamese, che al tignive vierte sul pet par vie dal grant cjalt. Al piçul crot al veve i pîts glaçâts e chest al pari di Milio i someave stomeôs Al smenà i braçs dal orôr, ma i tocjà, magari cussì no, di intivâsi te cogume, che si voltà Ma Milio, svelt come un fulmin, le cjapà di buride al svol, in mût che si stranfà dome un pôc di cafè il crot al jere sparît spaurît, al veve continuât la sô strade jù par i bregons dal pari di Milio, e cuant che il pari di Milio si visà, al là fûr dai semenâts Al scomençà a tirà ripadis ator, par fâ lâ fûr al crot de gjambe dai bregons, ma pecjât che la cogume si cjatà di gnûf in tal mieç dai pîts e a cjapà un rip e si voltà e se Milio di gnûf nol fos stât cussì svelt di tornà a metile impins, che a sarês stade, une volte par dutis, une cogume cence cafè, e al sarês stât ben insopuartabil.

Il crot nol intindeve par nuie restâ dulà che al jere. Cun tune vore di bon sens, al saltà fûr dilunc la gjambe dal bregon e Milio si cjapà cure di lui. Ma so pari al jere ancjemò rabiôs al crodeve che la storie dal crot a fos une des solitis baronadis di Milio, e nol jere par nuie vêr. Milio al veve imagjinât che a sarês stade Line a vierzi il zeut e che salacor si sarês consolade tanton tal viodi un piçul crot cussì dolç. O dîs dut chest, parcè che tu capissis che Milio nol veve simpri la vite facile e che a voltis al jere ritignût responsabil di baronadis che no jerin des veris baronadis. Par esempli, indulà varessial pretindût il pari di Milio che lui al tignìs il crot, mi domandi? Considerât che al veve dutis dôs lis sachetis dai bregons sbusadis?