40 (112)

 e jere plui svelt di ce che Gofrêt al podês impensâsi. Intun marilamp al fo parsore dai trampui e al clopà svelt jenfri i arbui di miluçâr. Al veve dal dut dismenteât il gustà de siore Petrell.

Invezit dentri te sô verande di veri i abitants di Katthult a vevin subit glotût al sformât di pes. Al fo di strade fât e di strade al rivà il moment di passà a le creme di cernicule. Di cheste an’d jere une vore. Une enorme supiere dal dut colmenade a stave tal mieç de taule.

— Cjapait su! — a disè la siore Petrell. — O speri che o vidiis apetit.

Jê no veve apetit e no tocjave la creme di cernicule, ma a continuave a fevelâ cence interuzion. A jere de grant stele comete che a stave fevelant, al jere l’argoment dal dì a Vimmerby.

— Al sarês masse teribil — a disè — se une stele comete a fos la fin di dut.

— Sì, cuissà, cheste creme di cernicule e jê salacor l’ultime robe che si mangje in cheste vite a disè la mame di Milio, e a chest pont il pari di Milio al slungjà pront il so plat.

— Salacor o pues domandâ ancjemò un pôc — al disè. — Par sigurece.

Ma prime che la siore Petrell a rivàs a servîlu, al tocjâ alc di spaventôs. Si sintì un davoi e si sintì un berli; al rivà alc vie pal grant lastron di veri daûr de siore Petrell e intun amen fruçons di veri e sope di cernicule si strucjarìn par dute la verande.