par cjatâ alc che a podeve
judâlu a dâ il culôr just de malatie a Ide. Insom, tal scritori,
al jere il calamâr de mame, chel che jê a doprave par scrivi cun
cure lis aventuris di Milio tai siei cuaders, o par scrivi lis
letaris d’invît al cafè de
domenie . Ancje la
brute copie da ultime letare di invît si cjatave propit sul
scritori. Milio al lei « àn il plasê » e al amirà sô mari che a
jere cussì inteligjente di scrivi e esprimi dut cussì ben. A jere
ben altre robe di chel Adrian che al jere dome bon di tirà fûr che
al veve « viodût un ors »
Aromai
sô mari no veve plui bisugne di che brute copie e cussì Milio al
imbalà il sfuei a balute e al imbombà la balute tal calamâr, e
cuant che la cjarte si fo imbombade di ingjustri, la tirâ sù e
tignìnle cun tune pinze si tirà dongje a Ide.
— Cumò, Ide, tu viodarâs
cemût che al è il tif — al disè, e Ide a riduçà contente.
— Siere
ben i voi, che no ti vadi l’ingjustri dentri — al disè Milio e
al piturà la piçule Ide biele turchine sù dute la muse, ma
judiziôs come che al jere, nol piturà ator dai voi, indulà che al
lassà il culôr naturâl in tun pâr di grancj cerclis blancs e
chescj cerclis blancs in tal mieç al blu a darìn a Ide un aspiet
cussì spaventosementri malât che Milio al vê pôre.
— Uhhh! — al disè Milio. —
Nene-Marte a à reson, il tif a jê une teribile malatie!
Nessun commento:
Posta un commento