Martas 22 di Maj

Martars 22 di Mai:
cuant che Milio al incjastrâ al cjâf te supiere.

 
In che dì a Katthult e vevin par gustà la mignestre di brût. Line a veve strucjât la mignestre te supiere a rosis e a jerin ducj sentàs ator de taule de cusine intents a mangjâ, Milio par prin. Che la mignestre i plaseve a si sintive.

«Àtu di tirà sù cu le bocje ta che maniere?» i domandâ sô mari.

«Se no tiri sù, no mi inacuarç che e jê mignestre» al disè Milio.

Ducj e mangjarin fin avonde, fin che la supiere e fo vueide. Insom al jere restat un got di brût. Milio lu voleve, e l’unic sisteme al jere chel di meti dentri al cjâf te supiere e supà su. Al fo ce che al fasè, e lu si sintì une vore clarementri brondâ là sot. Cuant che po al vê intension di tirà fûr al cjâf, incredibil ma vêr, nol rivâ! Al jere incjastrat! A chest pont, Milio si spaurì. Si alçâ di scat da taule e al restâ impalât cu le supiere sul cjâf, a mo’ di seglot. A jere calade oltri i vôi e lis orelis.