E jere Broka, si capîs a sec, une vacje cussì inoportune che e vêve di metisi a fâ juste cuant che e jerin altris robis urgentis di fâ e di issâ le bandere!
Il pari di Milio al scugnî implantâ sac e râvs e cori bande lis stalis. Milio e Ide a restârin dulà che jerin dapîd de mace.
«Cemût che e jè alte!» e saltâ sù jê. «di lassù si puès viodi fin a Mariantalund!»
Milio al restâ fis, ma no a dilung.
«O podên provâ daurman» al dissè. «ti plasarêsie se ti tiri sù?»
Le piçule Ide e tacâ a ridi. Oh, cemût ch’al jere gentil Milio e tropîs robis legris ch'al inventâve a martelet!
«Sì, o vuei viodi Mariantalund» e fricâ la piçule Ide.
«Ti impromet che tu le viodaras!» al dissè Milio cun buinegracie. Al cjapâ il rinçin che al servive a tacâ le bandere e lu impirâ ben ben te cinturie di Ide. Po al cjapò la cuarde de bandere cun dutis dôs lis mans.
«Cumò ti tiru sù» al dissè Milio.
«Ah, ah!» e rideve contente le piçule Ide.
Nessun commento:
Posta un commento