Ti visistu dut cumò dai abitants di Katthult? A jerin il pari di Milio che si clamave Toni, la mame di Milio che si clamave Alme, la sûr plui piçule di Milio che si clamave Ide, il famei che si clamave Fredo, la massarie di colonie che si clamave Line e tal ultin Milio che si clamave Milio.
E po Nene-Marte si capîs, jê no ven di dismenteâle. E jere un esemplâr di vecjute secje che a jere a stâ in tune cjasute sù tal bosc, ma e rivave intun marilamp a Katthult a judâ pe lissie, a jemplâ lis luianiis, a fâ pôre a Milio e Ide cu lis sôs stories spaventosis di spirts e fantasimis e sassins e laris, mâi e malatiis e altris deliziis des cualis Nene-Marte e jere simpri informade.
Ma cumò ti plasarês salacor sintî cualchi gnove baronade di Milio? A ‘nd faseve ducj i dîs infûr che cuant che al veve la fiere, si che duncje o poden cun calme meti la man sù qualsidisi dì dal grum e viodi ce che al fasé. A proposit, parcè no cjapâ propit il 28 di Lui?
Nessun commento:
Posta un commento