Sabide 28 di Lui: cuant che Milio al strucjâ le pastele de mule sù so pari e al intaiâ il so centesim pipinot di len.
Te cusine a Katthult e jere un vecjo sofà intenzût di blu, e sù chel sofà a durmive Line. In che volte di Milio e di cheste storie dute la regjon dal Småland e jere plene di sofàs-jet-di-cusine cun dentri mamulis che a durmivin sul stramaç dûr e lis moscjis ator. Cussì e jere ancje a Katthult. Line a durmive ben tal so sofà. Nissun al rivave a scjassâle prime des cuatri e mieze di matine, cuant che la svearine e sunave e jê a veve di jevâsi a molzi.
A pene Line e jere saltade fûr di cusine il pari di Milio al jentrave cucio cucio a bevi il so cafè matutin in sante pâs, prime che Milio si sveàs. Al jere biel, j someave, sentâsi al grande taule pleabile dal dut di bessôl, no viodi nissun Milio di nissune bande, sintî dome j uciei che cjantavin e lis gjalinis che fasevin cocode, bevuçant a cercis in maniere rumorose il so cafè, niçulantsi un pôc sule cjadree cu lis breis dal paviment sot lis plantis dal pîts che Line a veve freât tant di fâlis deventà blancjis a plen.., no, Line a veve freât lis breis dal paviment .no lis plantis dai pîts dal pari di Milio che a ‘nd varessin vût bisugne... ce saio jo... Il pari di Milio al cjaminave discolç la matine e no dome parcè che al jere plasevul.
Nessun commento:
Posta un commento