Milio al è un brâf frut – e disè – e nô i volin ben cussì cemût che al è.
E Line, la Serviute di Katthult e disè: - O ven di pensâ un pôc ancje ai Americans. No nus àn fat nie di mâl, parcè alore metiju tai fastidis?
La mame di Milio e dreçâ une voglade severe viers di jê e Line a capì di vê dite une stupidade. A scomençâ a barbotâ e a cirî di meti a puest lis robis:
Sì ma viodie siore – e disè al è sul gjornâl di Wimmerby di chel teribil taramot là jù in Americhe O vuei dî a sarês masse se cumò e in plui di dut ancje Milio…
Tâs Line ! – a disè la mame di Milio - Va te stale a molzi, e jê le uniche robe che tu sâs fâ.
Line a cjolè il seglot dal lat, si inviâ bande la stale e si metè a molzi a dute velocitât. E lavorave simpri miôr cuant che jere un pôc rabiose, par chel cumò a molzeve cun plui snait dal solit intant che a trabascjave tra se cun vôs sorde:
E a di jessi justizie in chest mont! Ducj i disastris no scugnìn migo veiju i Americans! Ma jo o fasarês vulintîr il sgambi cun lôr. O crot propit che o mandarai une letare in Americhe.
Velu Milio ! Mandait ben culì il taramot.
Biele presentuose chê Line ! A jere propit la persone juste par scrivi in Americhe, jê che no saveve scrivi in mût decent nancje a cjase sô! No, se propit cualchidun al veve di scrivi in Americhe, la mame di Milio a varês podût fâlu. Jê a jere brave. A scriveve di dutis lis baronadis di Milio in tun cuader turchin che a veve tal scansel dal scritori.
Nessun commento:
Posta un commento