45

«Cjale un pôc se chest dovê al veve di deventà urgjent propit tal moment di fâ fen!» Al bruntulâ il pari di Milio.
No i faseve plasê fâ di mancul di Fredo tal biel mieç de seselade, propit cuant che a Katthult si lavorave dûr. Ma nol jere però il pari di Milio, ma al jere il Guvier a decidi cuant che i fantats di Lònneberga a vevin di lâ te planure di Hultsfred par imparâ a fâ i soldâts. Ancje Fredo al sarês tornât, a pene ch’al vês imparât avonde e par chest nol voleve une vore di timp. Si che duncje Milio nol veve reson di vaî, ma al vaî di istès, e ancje Line a vaî. Parcè che Fredo nol plaseve dome a Milio.
Fredo nol vaî. Al disè che a Hultsfred si podeve ‘fâ baldorie e divertîsi une vore. E cuant che il saret si metè in moto e ducj a stavin li avilîts a saludâ cuntun mot de man par dii mandi, Fredo si niçâ, al sberlâ ‘Hurrà!’ e si metè a cjantâ par consolâ il cûr di ducj. Al cjantâ chest cjant:
Laju te planure
Si fâs simpri baldorie
La vite no jê dure:
lis feminis e amin la glorie!
Trallallà trallallera trallallà!
Trallallà trallalera trallallà!...