52

A lâ indenant a cjaval fin là di Milio al fo invezit l’omenut gras e rabiôs, che al disè cun zentilece:

«Ce sucedial, frut? Ti sêstu slontanât de mame e dal pai e ti sêstu pierdût?»
E jere la robe plui stupide che Milio al vês mai scoltât.
«Jo no mi soi pierdût» al disè, «jo o soi chi! Se cualchidun si è slontanât e si è pierdût, a son le mame e al pai.» e Milio al veve reson ae perfezion. I fruts piçui a podevin pierdisi te planure di Hultsfred, a veve dit la mame. In chel moment e jere jê però a jessi scliçade tra la fole insiemet al pari di Milio e a Line. E ducj e trê si sintivin pierdûts, parcè che nissun al podeve movisi dal propit puest, ancje se a vevin viodût Milio. Lu vevin olmât daurman cuant che al jere rivât cu la barete, il fusîl e la vecje cjavale. Il pari di Milio al veve dit:
«Se al va indenant cussì, Milio fasarà di strade un gnûf pipinot di len!»
«O soi dacuardi!» a veve confermât la mame. «Ma cemût brincâlu?»