58

‘O pues cjantâ un altri pôc e jemplâ di gnûf la mê barete’ al pensâ Milio. ‘A son ducj cussì bogns chi!’
Ma si sintive strac. Nol veve plui voie di cjantâ ni di vê altri polvar e al regalâ al vuarp i doi centesims. Po al torzeonâ un pôc ale ricercje di Fredo.
Milio al jere sigûr che ducj a fossin bogns, ma al veve tuart. Al podeve simpri capitâ di incuintrâ un esemplâr malin, vignût a pueste par chel dì te planure di Hultsfred. A chel timp si zirave ator di che bande un lari teribil cognossût come ‘al Sparvâl’, temût te interie regjon dal Smàland. Pardut e vessin lûc fiestis e marcjâts o in ogni câs e fos fole e bêçs atôr, si podeve jessi sigûrs che al Sparvâl al sarês comparît e al varês scomençât a robâ plui che al podeve. Par no fâsi cognossi, al puartave barbe e mostacjis diferentis in ogni ocasion. Chel dì al jere rivât te planure di Hultsfred e al zirave ator di che bande dapardut cun cjapiel a pan di zucar e mostacjis neris par viodi ce che al podeve robâ. Nissun al saveve che al jere in circolazion, se no te fole si sarês semenât il panic. Se al Sparvâl al fos stât savi, nol sarês capitât te planure di Hultsfred propit cuant che al jere Milio di Lònneberga cul so fusîl: figurâsi ce che al tocjâ!