- Sì, Milio al è chi – al disè il miedi. - Ma cumò al è miôr che lui al vadi fûr un moment, parcè che o ài di fâti un tai, Fredo! -
Inalore, tai voi di Fredo si viodè la pôre: nol jere usât ai miedis e ai tais.
O crôt che al vedi un pocje di pôre – al disè Milio. - Forsit al è miôr che jo i stedi dongje -
E il miedi al fasè di sì cul cjâf.
Sì, se tu sês rivât a puartâlu fin chi, tu rivarâs ancje a sopuartâ chest. -
E Milio al cjapà la man sane di Fredo ta sô e la tignì ferme, intant che al miedi al incideve che altre. Fredo nol mandà fûr un sun. Nol sberlà ni al vaì, al fo dome Milio a vaì un pôc, ma cussì cidin che nissun si visà. Milio nol tornà a cjase cun Fredo fin al dì prime de vilie di Nadâl. Dute Lonneberga a jere aromai al corint de sô imprese, e ducj a gjondarin.
Chel fantacin di Katthult, mi è simpri plasût - - a disevin ducj – No rivi a capî parcè che une vore di int si lamente cence polse di lui” cualchi baronade, dal sigûr, le à fate, ma chest lu fasìn ducj i fantats! -
Milio, par di plui, al veve cun se une letare dal miedi par sô pari e par sô mari, e li al jere scrit fra l'altri:
“ O podês jessi braurôs dal fantat che o vês “
E la mame di Milio a scrivè sul sô cuader: “ Signorut benedet, cemût che al è dolç pal gno puar cûr di mari che cussì spes al à fremût par Milio. E o fasarài ancje in mût che si vegni a savê ator. “
Nessun commento:
Posta un commento