La mame di
Milio a lampâ il so frut che al stave daûr dal barcon cu la
sclope a la muse. Sul imprin no à volût crodi che al fâses pardabon, ma cuant che a le
fin a capî che lu faseve, inalore a lâ di corse vie vaînt e a sveâ il pari di Milio.
— Milio al
stâ tal laboratori dal marangon e nol vûl lâ fûr a disè tra lis lagrimis. —Ce
podìno fâ?
La piçule Ide
si sveâ ancje jê e a scomençà dal moment a sberlâ. E ducj a larin di corse
bande dal laboratori dal marangon. Il pari di Milio, la mari di Milio e la
piçule Ide. E Fredo e Line, che jerin sentàs sui scjalins de cjasute dal famei
a straviâsi, a forin obleâts a molâ (cun grande rabie di Line). Ducj a vevin di
dâ une man par tirà fûr Milio. Tal imprin il pari di Milio al fo parbon dûr.
— Beh, tu vignarâs fûr cuant che tu varâs fan —
al sberlà.
— Ah! — al disè di gnûf Milio.
So pari nol
saveve ce che Milio al veve in tune scjatule daûr dal banc di marangon. Un vêr
e propit socors alimentâr: par fuarce! Plen di inventive come che al jere, al veve
savût cemût organizâsi par no murî di fan tal laboratori dal marangon. No si
podeve mai previodi in cuâl dì e in cuâl moment i podeve sucedi di finî li, sicheduncje
al veve simpri alc di mangjâ te sô scjatule. Che volte te scjatule al veve un
biel toc di pan integrâl, dal formadi .e un pâr di fetis di purcit frêt e cun di
plui
un biel pocjis di cjariesis conservadis e tantis fetis di pan biscotât. Une
vore di vuerîrs a àn sostignût l’assedi des lôr fuartecis assediadis cun mancul
provisions.
Nessun commento:
Posta un commento