Milio al
restâ li sentât sul cuviert, involuçât te sô cragnose cjamese, ma al indurì il
bust e, braurôs di se tant che un gjenerâl di armade che al partìs pal assalt,
al alçâ il so pugn sporc, armât di fusîl, cuintri il cîl, e al mandà fûr une
berlade che si sintì par dute Lönneberga:
— Usgnot al laboratori dal marangon al sarà
sdrumât, nissun mi sierarà plui dentri. Mai plui!
Fredo intant si jere plaçât sul pat de
cjasute, propit sot di Milio, slargjânt i braçs.
— Salte, Milio! — al disè.
E Milio al saltà. propit in tal braç di Fredo.
E po e larin ducj e doi jù tal lac a fâ il bagn. Milio a ‘nd veve propite
bisugne.
— Mai viodût un cacit simil! — a disè Line e
fûr di se de rabie si a lè a pognisi tal sofà jet di cusine.
Tal lac di
Katthult invezit, jenfri coçarate blancjis, a nadavin Milio e Fredo te aghe frescje,
e tal cîl a jere la Lune di Lui rosse tant che une lum e a lusive par lôr.
— Tu e jo,
Fredo — al disè Milio.
— Sì, tu e
jo, Milio! — al disè Fredo. — Cussì al va ben!
Un larc sflandorôs rai lunâr
al traviersave il lac, ma par dentri, dilunc lis spuindis, il scûr al jere fis. parcè
che aromai a jere gnot e il 28 di Lui al stave par finî.
Ma a vignirin gnûfs dîs cun gnovis baronadis.
La mame di Milio a continuave a scrivi sul so diari turchin tant di fassi vignì
mâl tal braç, e a le fin il cuader al fo plen folcjât par dilunc e par larc.
Nessun commento:
Posta un commento