22 (94)

 — Però no si pues jessi sigûrs che chel disgraciât di frut al stes parbon sierât là dentri — a bruntulave dentri vie, e cussì a lâ vuate vuate fûr dal laboratori dal marangon e a inclostrà di gnûf la puarte par di fûr.

Fredo al sunave la armoniche e al cjantave e no si visâ de tristerie di Line. « Il cjaval dal fantat al va di trot, al va di trot », al cjantave Fredo. Milio al sintì, di là che al jere sentât, e al suspirà in maniere profonde.

Line a metè il braç ator dal cuel di Fredo, a tabaiave e tabaiave come che a jere sô usance, e Fredo al rispuindeve cemût che al jere solit rispuindi:

 — Beh, dal sigûr che o pues sposâmi cun te, se tu propit tu lu vuelis cun tante insistence, ma però no jê premure.

 — Almancul l’an che al ven — a disè Line sodìnte, e Fredo inalore al mandà fûr un suspîr plui grues di chel di Milio e al cjantâ « Doman e jê fieste ». Milio al sintì ancje che cjançon, di là che al jere sentât, e al scomençà a pensâ cemût che al sarês stât divertent, a dispiet di dut, lâ al lac cun Fredo.

 « In fin dai conts» al disè a se stes, « o podarês lâ, folc ti trai, a fâ un zirut cun Fredo e a fâ un salt in aghe, e po o podarês tornâ di gnûf tal mê laboratori dal marangon, se o ài voie di fâlu ».

 Milio al lâ di corse a le puarte e a gjavà la stangje. Ma a ce servivial cuant che che triste di Line le veve sierade di di fûr? La puarte no si moveve, a dispiet che Milio la sburtàs cun dutis lis sôs fuarcis. Inalore Milio al capì. Al capì daurman cui che al jere stât a sierâlu li dentri.

 — Je fâs paiâ jo — al disè. — cumò a viodarà.