21 (93)

E par Milio il laboratori dal marangon al jere propit une fuartece assediade che lui al intindeve difindi dai nemiìs. Ardît tant che un gjenerâl al stave daûr dal barcon cul fusîl simpri a la muse in spiete .

 — Al prin che al ven chi, o trai! — al sberlâ.

 — Oh, Milio, fion gno amât, no sta fevelâ cussì, Ven fûr — e diseve la mame tra lis lagrimis. Ma nol servive a nie. Milio al jere dûr tant che un cret. Nol servì nancje a nie chel che al disè Fredo:

— Scolte, Milio, ven fûr e o lin tal lac a fâ il bagn, te e jo!

 — Ah no! — al sberlâ Milio cun marum. — Stâ ben sentât sui scjalins cun Line, stâ, stâ, par caritât! Jo, jo o stoi sentât chi!

 E cussì al fo. Milio al restâ dulà che al jere. E cuant che dut al fo inutil, e menacis e preieris, inalore a forin obleâts a tornâ in cjase e a metisi tal jet, il pari di Milio e la mari di Milio e la piçule Ide.

A fo un malinconiche sabide di sere La mame di Milio e la piçule Ide a vaîrin tant che dôs fontanis, il pari di Milio al mandà fûr dai suspîrs profonts lant tal jet, parcè che j mancjave il so frut che par solit al jere distirât là jù tal jetut cul cjâf biont sul cussin e il so baret e il so fusîl dongje

 A  Line invezit no j dulive il cûr dal sigûr par Milio e no i vignî nancje in tal cjâf di lâ a durmî. A voleve stâ sentade sui scjalins cun.Fredo, e a voleve stâ sentade là in pâs, e sicheduncje a fo contente in plen che Milio al stas sierât in tal laboratori dal marangon.