- Ma Line no deventà par nie avilide e no si scandalizà un fregul,
- - Cussì tu crodis, eh? - a disè – Tal fas viodi jo alore! -
- E Fredo al capì in ta chel istant che no si sarês mai liberât di Line. Ma propit che sere al voleve jessi ancjemò libar e content come une vacje, e par chel al lee cun Milio ju fin al lâc di Katthult e si sentà a pescjà perche.
- A jere une cussì biele serade come che pues jessi cuasi dome tal Smaland. Dutis lis plantis di lile a jerin in flôr, i merlis a cjantavin, i mussats a businavin e i perche a muardevin legris. Si sentarin là Milio e Fredo e il lôr riflès al vongolave su la aghe slusinte. No cjacaravin masse ma a stavin avonde ben. A restarin sentàs là fin che il soreli al scomençà a là a mont, e po a lerin a cjase. Fredo cui perche impiràs in tun rimpin a forcje, Milio che al sunave un pifar di len di vencjâr, che i veve intaiât Fredo. A cjaminarin vie pai cjamps su un troi intorteât sot lis bedois verdis de Vierte. Milio al soflave in tal so pifar tant che i merlis a restavin maraveâts, ma a colp al molà e al gjavà di bocje al pifar.
- - Sâstu ce che o fasarai doman? - al disè.
- No, no lu sai – al disè Fredo – Ise cualchi baronade? -
Milio
al ficjà une altre volte il pifar in bocje e al tacà ancjemò a
sunà. Al cjaminave, al soflave e al pensave.
- No lu sai – al disè a la fin – no lu sai mai prime di dopo-.
Nessun commento:
Posta un commento