20 (194)

Milio al veve pôre che a mandassin in fruçons il so Fredo, e al sburtave la sô palete cuintri il côl di fameis par cirî di tirâlu fûr, propit come cuant che un al zuc a « Sciangai ». Ma nol rivave, e intant che Milio al stave là, al vignive simpri fûr cualchi pugn rabiôs che al tentave di tirà in bal ancje lui tal cûr de lote.

Milio nol intindeve par nuie imbusâsi te barufe. Duncje al saltà in grope a Luche e al zirà al galop ator dal trop in lote e, cuant che al comparì sul so cjaval cui cjavei al vint e la palete dal pan tal pugn dret, al someave cuasi un cavalîr antîc che cun slanc eroic si butta tal combatiment.

Milio al lave a cjaval ator e al parave in bande cu la palete cui che i capitave sot: a cjaval al veve plui fuarce, tant di rivà a rimovi al strat difûr dai fameis, ma si ingropavin simpri di gnûfs e cundut che Milio al lavoràs a fuart di palete, nol rivave a liberà Fredo.

Dutis lis feminis e i fruts presints a le aste a vaìvin e berlavin in mût oribil, e il pari di Milio e chei altris contadins di bon sens che si crodevin masse par ben par dâsi, a stavin là a ripeti inutilmentri:

— Beh, cumò finîle, fantats! A saran altris astis, o podês sparagnâ par che volte un pôcs di pugns!

Ma i fameis a jerin cussì impegnats che no sintivin nie: a volevin dome dasi, dasi e dasi!

Milio al butà vie la palete dal pan.

— Cumò, Line, tu âs di dati da fâ un pôc ancje tu invezit di stâ li a ciulâ! — al disè. — Pense al to morôs