77 (149)

• E ancje la mame e sarà contente – al disè Milio.
• - Sì, ma al pai alore?
• - Hmm! - al disè Milio. - Ma in ogni mût no jê une baronade.
  Po al restà cidin e al pensà ancjemò.
• - Ma fau vignî fûr de tane dal leon a sarà la robe plui intrigose! Al disè. - Vignît, che o lin e o provin!
  A chest pont la comandante si jere jemplade di luianiis e budin di mule, di persut e di gjeladine di purcit; di panins cul zafaran e di biscots cul zenzevar e a veve, cence nissun pudôr, nulît dut il tabac di nas di Tite il Gnogno. Cumò a stave sentade tal so cjast e si sintive cussì come che al tocje cuant che si à la cussience sporcje e la panze masse plene. No voleve stà cun chei altris, parcè che dome a suspiravin, la cjalavin di brut cei e no disevin une peraule. Ma tal mieç dal displasê, a sintì cualchidun che al tucave la puarte di fûr e a spesseà a cori ju pe scjale dal cjast par viodi cui che al jere.
  Al jere Milio che al stave lì su le puarte di jentrade, Milio di Katthult. La comandante a bacilà. Forsit Tite il Gnogno e Dute Vues a vevin cjacarât e Milio al vignive par chest.
• Ma il piçul Milio si inchinà cun tante zentilice e al disè:
• - O ài pôre di vè dismenteât il gno britulin, la ultime volte che o soi stât culì.
• Ce scaltri che al jere, Milio! Il britulin lu veve te sachete dai bregons, al sigûr, come che nol jere mai stât, ma al veve bisugne di alc par podè tabaià une volte che al jere entrât tal Ricovar dai puars e duncje al tirà fûr che scuse.

149