E
propit inalore il cjar al svoltà sul volt, tal ultin volt de strade,
e poderin viodi la lûs dal barcon de cusine di Katthult, dulà che
Nene-Marte a spietave cu la cene pronte.
Cumò
tu tu crodarâs che Milio al vês metût fin a lis sôs baronadis
parcè che al veve rivât a vê un cjaval, ma nol fo cussì. Par doi
dîs al cjavalgjà Luche, ma za al tierç dì, ossidi il 3 di
Novembar, al jere pront
a scomençâ di gnûf. Induvine ce che al fâse... ah, ah, mi ven di
ridi cuant che i pensi! Al fo cussì: Milio propit chel dì.., no,
stop! Stop! O ài prometût a le mame di Milio di no contà mai ce
che al fâse il 3 di Novembar, parcè che al è propit dopo che
baronade che i abitants di Lönneberga a tirarin su il polvar che ti
ài contât e a deciderin lôr di mandâ Milio in Americhe. La mame
di Milio a preferì dismenteà dut e no scrivè nancje sul cuader
turchin, e parcè varessio inalore di contâusal? No, invezit tu
puedis sintî ce che Milio al metè dutun cun la zornade dopo Nadâl
di chel an.
Nessun commento:
Posta un commento