69 (141)

Ricovar dai puars. Tu no tu sâs ben ce che al jere ta chei timps un Ricovar dai puars, e tu puedis sta content. Il Ricovar dai puars al jere la plui oribile di dutis lis robis oribilis di Nene Marte. Imagjiniti une misare betule di un pâr di stanziis dutis plenis di int puare e mal ridote, che a jere a sta li dentri in tun unic miscliç fat dome di cragne fan e disgraciis. Chel di Lonneberga nol jere piês di chei altris, ma al jere distês un oribil puest là che a lavin a finî dai vecjos e inabii.

• Puar nono! - al diseve di spes Fredo. - Nol à di sigûr une vite plasevule!- Nol sarês però tant mâl se la comandante no fôs une sbilfe.
  La “comandante” a jere chê che a direzeve il Ricovar dai puars. Ancje jê a jere une ospite, ma a jere la plui gruesse, e la plui fuarte e la plui prepotente, e par chest a jere stade metude a comandâ, robe che no sarês mai sucedude se Milio al ves vût il timp di cressi e deventâ sindic. Ma inalore purtrop al jere dome un frutin e nol podeve fa nie cuintri la comandante. Il nono di Fredo e i siei compagns a vevin une grande pôre di jê.
• - Cjalait a ven indenant come un leon che al rugne tal mieç dai agnei – a veve la usance di dî Tite il Gnogno. Al jere un pôc stramp. Tite, al cjacarave simpri par sentencis e metaforis; ma al jere zentîl e Fredo i voleve tant ben al so vecjo nono.
• Chei che a jerin a sta tal Ricovar dai puars no rivavin cuasi mai a mangjâ a vonde, e cheste a jere une grande disgracie, a pensave la mame di Milio.